በታሰሩት የተቃዋሚ ፓርቲዎች አመራሮች ላይ የ28 ቀናት ጊዜ ቀጠሮ ተጠየቀባቸው

EthiopianReporter Jul 21 2014

-የታሳሪዎቹ ጠበቃ የሥነ ሥርዓት ሕጉ ተጥሷል ይላሉ

-ፍርድ ቤቱ በ48 ሰዓት ውስጥ መቅረባቸውን አረጋግጫለሁ ብሎ ብይን ሰጥቷል

የብሔራዊ መረጃና ደኅንነት አገልግሎትና የፌዴራል ፖሊስ የጋራ ፀረ ሽብር ግብረ ኃይል፣ ሐምሌ 1 ቀን 2006 ዓ.ም. በቁጥጥር ሥር ያዋላቸውን የአንድነት፣ የሰማያዊና አረና (ትግራይ) ፓርቲዎች አመራሮች በ48 ሰዓታት ውስጥ ፍርድ ቤት አቅርቦ የ28 ቀናት የምርመራ ጊዜ ቀጠሮ እንደጠየቀባቸው ማረጋገጡን ፍርድ ቤት አስታወቀ፡፡

የፌዴራል የመጀመርያ ደረጃ ፍርድ ቤት አራዳ ምድብ ሁለተኛ ፍትሐ ብሔር ችሎት፣ ሐምሌ 10 ቀን 2006 ዓ.ም. አንድነት ለዲሞክራሲና ለፍትሕ (አንድነት) ፓርቲ፣ በፀረ ሽብር ግብረ ኃይሉ ላይ አቅርቦት በነበረው፣ አካልን ነፃ ማውጣት (ሐቢየስ ኮርፐስ) ክስ ላይ በሰጠው ብይን፣ ግብረ ኃይሉ ተጠርጣሪዎቹን በ48 ሰዓታት ውስጥ ፍርድ ቤት ማቅረቡን የሚያረጋግጥ ሰነድ ማያያዙን አስታውቋል፡፡

ተጠርጣሪዎቹ በፀጥታ ኃይሎች በቁጥጥር ሥር የዋሉት ሕጉንና አካሄዱን በጠበቀ ሁኔታ ከፍርድ ቤት ማዘዥ ወጥቶ መሆኑንና በ48 ሰዓታት ውስጥም ፍርድ ቤት በማቅረቡ፣ ድርጊቱ ሕገወጥ አለመሆኑን ፖሊስ ለፍርድ ቤት ማስረዳቱ ታውቋል፡፡

የአንድነት ፓርቲ የሕዝብ ግንኙነት ኃላፊ አቶ ሀብታሙ አያሌው፣ የፓርቲው የምክር ቤት አባል አቶ ዳንኤል ሽበሺ፣ የአረና (ትግራይ) አመራር አቶ አብርሃ ደስታና የሰማያዊ ፓርቲ ምክር ቤት ምክትል አፈ ጉባዔ አቶ የሽዋስ አሰፋ ጠበቃ አቶ ተማም አባቡልጉ ግን፣ ፍርድ ቤቱ ብይን ሲሰጥ የሥነ ሥርዓት ሕጉ ተሰጥቷል ይላሉ፡፡

ጠበቃው ሥነ ሥርዓቱ ተጥሷል የሚሉበትን ምክንያት እንዳብራሩት፣ ክርክሩ የፍትሐ ብሔር ክርክር በመሆኑ ተጠርጣሪዎቹ ፍርድ ቤት መቅረብ እንደነበረባቸውና ክርክር መደረግ እንደነበረበት አስረድተዋል፡፡ ተጠርጣሪዎቹ በ48 ሰዓታት ፍርድ ቤት ስለመቅረባቸው ፖሊስ ማስረጃ ማቅረቡን ከመንገር ውጪ፣ የቀረበው ሰነድ ለተጠርጣሪዎቹ ጠበቃ አለመሰጠቱን የሚናገሩት አቶ ተማም፣ ቢሰጥ እንኳን ቀደም ባለው ቀጠሮ ላይ ፖሊስ ሲቀርብ የማስረጃ ሰነድ ባለማቅረቡ፣ የማቅረብ መብቱ መታለፉን አስረድተዋል፡፡ በመሆኑም አካሄዱ አግባብ አለመሆኑን አክለዋል፡፡

ፍርድ ቤቱ ቀደም ባለው ቀጠሮው ፖሊስ ተጠርጣሪዎቹን ይዞ እንዲቀርብ ትዕዛዝ የተሰጠ ቢሆንም፣ ሐምሌ 10 ቀን 2006 ዓ.ም. አለመቅረባቸውን የጠቆሙት ጠበቃው፣ ፍርድ ቤቱ የሰጠው ትዕዛዝ አለመከበሩን ተናግረዋል፡፡ ሌላው ፓርቲው በክስ አቤቱታው አቅርቦ የነበረው አባሎቹ በፀጥታ ኃይሎች የተያዙት አላግባብና ሕገወጥ በሆነ መንገድ ስለመሆኑ ቢሆንም፣ ፍርድ ቤቱ እንደማይመለከተው ገልጾ፣ ጥያቄውን ጊዜ ቀጠሮውን ለሰጠው ለፌዴራል የመጀመርያ ደረጃ ፍርድ ቤት አራዳ ምድብ አንደኛ ወንጀል ችሎት እንዲያቀርቡ መንገሩን ጠበቃው አቶ ተማም ገልጸዋል፡፡

Read 32170 times