የቤቶች ልማት ፕሮጀክት ፅሕፈት ቤት ምክትል ስራ አስኪያጅ ያልተገባ ግዥ ፈፅመዋል በሚል በቁጥጥር ስር ዋሉ

ኢሬቴድ Jul 17 2014

የፌዴራል የስነ-ምግባር እና የፀረ ሙስና ኮምሽን ያልተገባ ግዥ ፈፅመዋል በሚል የተጠረጠሩ የአዲስ አበባ ከተማ አስተዳደር የቤቶች ልማት ፕሮጀክት ፅሕፈት ቤት ምክትል ስራ አስኪያጅ፣ የፅሕፈት ቤቱ የግዥ ስራ ሂደት ኃላፊ እና የእቃ አቅራቢ ደርጅት ባለቤትና ስራ አስኪያጅ የሆኑትን ግለሰቦች በቁጥጥር ስር አዋለ፡፡

 

ግለሰቦቹ በቁጥጥር ስር የዋሉት የአዲስ አበባ ከተማ አስተዳደር የቤቶች ልማት ፕሮጀክት ፅሕፈት ቤት የሳኒተሪ እቃዎችን ለመግዛት ያወጣውን ጨረታ ያሸነፈው ድርጅት በጨረታው ከተገለፀው ውጭ ጥራታቸውን ያልጠበቁ እቃዎችን በማቅረቡና ኃላፊዎቹም ጥራታቸውን ያልጠበቁ እቃዎች ግዥ ፈፅመዋል በሚል ተጠርጥረው ነው፡፡

 

እቃዎቹ ለማቅረብ ጨረታውን ያሸነፈው ግለሰብ የፋብሪካ ባለቤትና ስራ አስኪያጅ ጥራታቸውን ያልጠበቁ የሳኒተሪ እቃዎች በማቅረቡ ተጠርጥሮ በቁጥጥር ስር መዋሉ ተመልክቷል፡፡

 

የቤቶች ልማት ፕሮጀክት ፅሕፈት ቤት ምክትል ስራ አስኪያጅ እና የፅሕፈት ቤቱ የግዥ ስራ ሂደት ኃላፊም የሳኒተሪ እቃዎቹ ጥራት የጎደላቸው ስለመሆኑ መረጃ የደረሳቸው ቢሆንም ግዥው በቸልተኝነት እንዲፈፀም ማድረጋቸው ተገልጿል፡፡

 

በዚህ ባልተገባ የግዥ አፈፃፀም ሂደት ውስጥ ወደ 200 ሚሊዮን ብር የሚጠጋ ዋጋ ያላቸው ጥራታቸውን ያልጠበቁ የሳኒተሪ እቃዎች ለፕሮጀክት ፅ/ቤቱ መቅረባቸውን የኮሚሽኑ የምርመራ እና አቃቤ ህግ አስታውቀዋል፡፡

Read 32574 times Last modified on Jul 17 2014