Print this page

ፀረ ሙስና ኮሚሽን ጠቅላይ ፍርድ ቤት ውድቅ ያደረገበትን ክስ አሻሽሎ አቀረበ

EthiopianReporter Jul 07 2014

-እነ አቶ መላኩ ፈንታ ለብይን ተቀጠሩ

የፌዴራል የሥነ ምግባርና ፀረ ሙስና ኮሚሽን ዓቃቤ ሕግ በእነ አቶ መላኩ ፈንታ ላይ በመዝገብ ቁጥር 141356  ‹‹ማሻሻል የለብኝም›› ብሎ ለይግባኝ ያቀረበውንና ጠቅላይ ፍርድ ቤት ውድቅ ያደረገበትን ክስ አሻሽሎ፣ ሰኔ 27 ቀን 2006 ዓ.ም. ብይን ለሰጠው ፍርድ ቤት አቀረበ፡፡

በፌዴራል ከፍተኛ ፍርድ ቤት ልደታ ምድብ 15ኛ ወንጀል ችሎት፣ የኮሚሽኑ ዓቃቤ ሕግ በከባድ የሙስና ወንጀል ተጠርጥረውና ታስረው በሚገኙት እነ አቶ መላኩ ፈንታ 28 ክሶችን አቅርቦ ነበር፡፡ ፍርድ ቤቱ ከተጠርጣሪዎች በቀረበው የክስ መቃወሚያ መሠረት ዓቃቤ ሕግ 23 ክሶችንና በቡድን የተከሰሱትን በተናጠል አሻሽሎ እንዲያቀርብ፣ ጊዜና ቀን ያልተጠቀሰባቸውን ክሶች በማስተካከል ለክሶቹ ማስረጃነት ያቀረባቸው የሰነድ ማስረጃዎች የትኛው ማስረጃ ለየትኛው ክስ እንደሚያስረዳ አስተካክሎ እንዲያቀርብ፣ ፍርድ ቤቱ ብይን መስጠቱን መዘገባችን ይታወሳል፡፡ 

የፍርድ ቤቱ ብይን ያላስደሰተው የኮሚሽኑ ዓቃቤ ሕግ ብይኑን በመቃወም ለጠቅላይ ፍርድ ቤት ይግባኝ ያቀረበ ቢሆንም፣ ፍርድ ቤቱ የሥር ፍርድ ቤት ብይን የሚነቀፍ ሆኖ ባለማግኘቱ ብይኑን በማፅናት፣ ዓቃቤ ሕግ ብይኑን እንዲያከብር ሰኔ 24 ቀን 2006 ዓ.ም. ውሳኔ ሰጥቷል፡፡ 

በመሆኑም የኮሚሽኑ ዓቃቤ ሕግ በከፍተኛው ፍርድ ቤት እንዲያሻሽል በብይን የተሰጠውን ትዕዛዝ ተግባራዊ በማድረግ ክሱን አሻሽሎ አቅርቧል፡፡

ተጠርጣሪዎች የኮሚሽኑ ዓቃቤ ሕግ አሻሽሎ ባቀረበው ክስ ላይ ተቃውሞ ካላቸው፣ ሐምሌ 2 ቀን 2006 ዓ.ም. በሬጅስትራር በኩል እንዲያቀርቡ ታዘዋል፡፡ በዕለቱ የኮሚሽኑ ዓቃቤ ሕግ የክስ መቃወሚያውን ተቀብሎ፣ የመቃወሚያ መቃወሚያ ካለው ሐምሌ 7 ቀን 2006 ዓ.ም. በሬጅስትራር በኩል እንዲያቀርብ በማዘዝ፣ ፍርድ ቤቱ ሁሉንም መርምሮ ብይን ለመስጠት ለሐምሌ 11 ቀን 2006 ዓ.ም. ቀጠሮ ሰጥቷል፡፡

Read 32691 times