Print this page

ለኔትወርክ ማስፋፊያ ይውል የነበረን እቃ የመዘበረው ግለሰብ በ7 አመት ፅኑ እስራትና በገንዘብ ተቀጣ

FanaBC Apr 01 2014

በአዲስ አበባ ከተማ አስተዳደር  ለሚገኙ አስሩም ክፍለ ከተሞች ለኔትወርክ ማስፋፊያ እንዲውል የተረከባቸውን የተለያዩ እቃዎች የመዘበረው የአስተዳድሩ የንግድ ኢንደስትሪ ልማት ቢሮ ባልደረባ ዛሬ በሰባት አመት ፅኑ እስራትና በገንዘብ ተቀጣ።

ወንጀለኛው በቢሮው የኢንፎርሜሽን ኮሙኒኬሽን ቴክኖሎጂ አስተዳደር ክፍል ውስጥ ይሰራ የነበረ ሲሆን፥ አያሌው በቀለ ይባላል።

የ42 አመቱ ጎልማሳ ሰኔ 2003 ዓ.ም ለአስሩም ክፍለ ከተሞች ኔትወርክ ማስፋፊያ ከተረከባቸው እቃዎች 282 ሺህ ብር ግምት ያላቸው የተለያዩ እቃዎችን ለግል ጥቅም አውሏል።

በዚህ ጥፋቱ የፌደራል የስነ ምግባርና ፀረ ሙስና ኮሚሽን አቃቤ ህግ በከባድ የእምነት ማጉደል የሙስና ወንጀል ክስ መስርቶበት ጉዳዩ ሲታይ ቆይቶ ነው ዛሬ እልባት ያገኘው።

ተከሳሹ ከአቃቤ ህግ ማስረጃ በኋላ ባቀረበው የመከላከያ ማስረጃ የስራ መደቤ ገንዘብ ያዥ አይደለም፤ ያለአግባብ ነው ያስረከቡት፤ እንደዚያም ሆኖ ለአንድ አመት ያህል እቃው ጥቅም ሳይሰጥ መሰንበቱ ጥፋተኛ አስብሎኛል የሚሉና ሌሎች ምክንያቶችን አቅርቧል።

ግለሰቡ የንብረት ክፍል ሰራተኛ ሳይሆን እንዲረከብ ያደረገው የቅርብ ሀላፊው አቶ ሚልኪያስ መንገሻ የተባለው ግለሰብም ከዚህ በፊት ቅጣት ተላልፎበታል።

የፌደራሉ ከፍተኛ ፍርድ ቤት 1 ወንጀል ችሎት ምንም እንኳን ያለ መደብህ ንብረት ብትረከብም፤ የተጣለብህን አደራ ወደ ጎን በመተው ለክፍለ ከተሞቹ ኔትወርክ ማስፋፊያ ይውል የነበረውን እቃ መመዝበርህ የወንጀሉን ደረጃ አነስተኛ አያሰኘውም ብሏል።

በዚህም የአቃቤ ህግ የቅጣት ማክበጃ ባያቀርብም፥ ግለሰቡ የቀደመ የወንጀል ሪከርድ የሌለበትና ቤተሰብ አስተዳዳሪ መሆኑን ከግምት ውስጥ በማስገባት በሁለት የቅጣት ማቅለያዎች በሰባት አመት ፅኑ እስራትና በአራት ሺህ ብር ቀጥቶታል።

Read 34997 times