የእነ ዳዊት ኢትዮጵያ እና ሌሎች ተከሳሾች የክስ መቃወሚያዎች ውድቅ ተደረጉ

Fanabc Mar 04 2014

በሙስና ወንጀል ክስ ተመስርቶባቸው በማረሚያ ቤት ሆነው ጉዳያቸውን በመከታተል ላይ ያሉት  የገቢዎችና ጉምሩክ ባለስልጣን የቀድሞ ከፍተኛ የስራ ሃላፊዎች አቶ ዳዊት ኢትዮጵያ እና ሌሎች አራት ተከሳሾች ያቀረቧቸው ሶስት የክስ መቃወሚያዎች ውድቅ ተደረጉ።

የፌደራል የስነ ምግባርና ፀረ ሙስና ኮሚሽን አቃቤ ህግ ከኮንትሮባንድ ጋር በተያያዘ ስልጣንን አለአግባብ በመጠቀም ክስ የመሰረተባቸው አቶ ዳዊት ኢትዮጵያ፣ አቶ ዘሱ ወልደጊዮርጊስ፣ አቶ እዮብ ጌታቸው፣ አቶ በላይነህ ደሴ እና አቶ እሸቱ አጥላው ናቸው።

የፌደራሉ ከፍተኛ ፍርድ ቤት 15 ወንጀል ችሎት ተከሳሾች በዛሬው እለት ያቀረቧቸውን ሶስት መቃወሚያዎች ውድቅ ያደረገ ሲሆን፥  ክሱን አስመልክተው በሰጡት የእምነት ቃልም ወንጀሉን አልፈፀምንም ብለው ክደው  በመከራከራቸው ችሎቱ የአቃቤ ህግን ማስረጃ ለመስማት ለመጋቢት 8 ቀን 2006 ዓ.ም ተለዋጭ ቀጠሮ ይዟል።

የገቢዎችና ጉምሩክ ባለስልጣን ከፍተኛ የስራ ሃላፊዎች ሆነው በቁጥጥር ስር ከዋሉት ጋር አብረው የተደመሩት ባለሀብቱ አቶ ማሞ ኪሮስ ዛሬ በዋስትና 30 ሺህ ብር አስይዘው ከእስር እንዲፈቱ ችሎቱ የበየነ ሲሆን፥ ተመስርቶባቸው የነበረው የሙስና ወንጀል ክስም ወደ ከባድ የማታለል ወንጀል እንዲሻሻል ተወስኗል።

ተከሳሹ ከአገር እንዳይወጡም ለዜግነትና ኢሚግሬሽን ጉዳይ መምሪያ ደብዳቤ መፃፉም ተገልጿል።

ችሎቱ የተከሳሹን የመከላከያ ምስክር ለማድመጥም ለሚያዚያ 2 ፣ 2006 ዓ.ም ተለዋጭ ቀጠሮ ይዟል።

በሌላ በኩል የቀድሞ የደህንነት መስሪያ ቤት ባለደረባ የነበሩት አቶ ወልደስላሴ ወልደሚካኤል ከነቤተሰቦቻቸው ከተመሰረተባቸው የሙስና ወንጀል ክሶች መካከል በ11ኛው ክስ ላይ ባቀረቡት የክስ መቃወሚያ ላይ ብይን ለመስጠት ችሎቱ ለመጋቢት 2 ቀን 2006  ዓ.ም ተለዋጭ ቀጠሮ ይዟል።

Read 32398 times