23 October 2014 Written by  EthiopianReporter

በዛምቢያ 26 ኢትዮጵያውያን የአንድ ዓመት እስራት ተፈረደባቸው

አስፈላጊውን የስደተኞች ሥነ ሥርዓት ሳያሟሉ ወደ አገሬ ገብተዋል በማለት ደቡብ አፍሪካዊቷ አገር ዛምቢያ በ26 ኢትዮጵያውያን ላይ የአንድ ዓመት እስራት፣ ከባድ የጉልበት ሥራና 4,500 የዛምቢያ የገንዘብ (ኩዋቻ) ቅጣት አስተላለፈች፡፡

ታይምስ ኦፍ ዛምቢያ በድረ ገጹ የዛምቢያ ስደተኞች ጉዳይ የሕዝብ ግንኙነት ኃላፊ ናማቲ ሺንካን ጠቅሶ እንደዘገበው፣ በ26 ኢትዮጵያውያን ላይ ውሳኔው የተላለፈው የስደተኞች ጉዳይ መሥሪያ ቤት ሳይቀርቡና አስፈላጊውን ሥነ ሥርዓት ሳያሟሉ ወደ አገሪቱ በመግባታቸው ነው፡፡

በኢትዮጵያውያኑ ላይ ይህ የቅጣት ውሳኔ የተላለፈው ባለፈው ሳምንት ሐሙስ ሲሆን፣ ሕገወጥ የተባሉት ስደተኞች በዛምቢያ የስደተኞች ኃላፊዎች በቁጥጥር ሥር የዋሉት ደግሞ ነሐሴ 18 ቀን 2006 ዓ.ም. ነበር፡፡ ኢትዮጵያውያኑ ወደ አገሪቱ ሊገቡ የነበረው  በሁለት ተሽከርካሪዎች ተጭነው የነበረ ቢሆንም፣ ከየት እንደተነሱና ወዴት እየተጓዙ እንደነበር አልተገለጸም፡፡

በተመሳሳይ ዜና በዛምቢያ ርዕሰ መዲና ሉሳካ የሚገኘው የስደተኞች ጉዳይ ቢሮ፣ በሕገወጥ መንገድ ወደ አገሪቱ ገብተዋል ያላቸውን ሌሎች 24 ኢትዮጵያውያንን ከአገሪቱ ማባረሩም ተዘግቧል፡፡

እነዚህ ከአገሪቱ የተባረሩት 24 ኢትዮጵያውያን ሉሳካ ከሚገኘው የኬኔት ካውንዳ ዓለም አቀፍ አውሮፕላን ማረፊያ በኩል በዓለም አቀፍ የስደተኞች ድርጅት የገንዘብ ድጋፍ እንዳደረገላቸውም ተጠቅሷል፡፡ ወደ አገራቸው ይመለሱ ወይም ወደ ሌላ አገር ይጓዙ በዘገባው ተብራርቶ አልቀረበም፡፡