23 October 2014 Written by  EthiopianReporter

በደሴ ከተማ የሃይማኖት አባት ገድለዋል የተባሉ ተጠርጣሪዎች ተከላከሉ ተባሉ

በእስልምና እምነት ተከታዮች ዘንድ የሃይማኖት አባት የነበሩትን፣ ሼክ ኑሩ ይማምን በመግደል ወንጀል ተጠርጥረው የታሰሩ 14 ተጠርጣሪዎች፣ የተመሠረተባቸውን ክስ እንዲከላከሉ የፌዴራል ከፍተኛ ፍርድ ቤት 19ኛ ወንጀል ችሎት ጥቅምት 11 ቀን 2007 ዓ.ም. ብይን ሰጠ፡፡

የፌዴራል ከፍተኛ ዓቃቤ ሕግ የመሠረተውን የሰው መግደል ወንጀል ክስ ተጠርጣሪዎቹ ክደው በመከራከራቸው፣ ዓቃቤ ሕግ እንደ ክሱ ያስረዱልኛል ያላቸውን 28 ምስክሮቹን አቅርቦ አሰምቷል፡፡

ዓቃቤ ሕግ የመሠረተውንና ምስክሮችን ያሰማበትን ክስ ተጠርጣሪዎቹ በመስቀለኛ ጥያቄ ማስተባበል እንዳልቻሉ ፍርድ ቤቱ ገልጾ፣ ሁሉም ተጠርጣሪዎች እንዲከላከሉ ብይኑን ሰጥቷል፡፡

ሁሉም ተጠርጣሪዎች እያንዳንዳቸው በነፍስ ወከፍ ስድስት የመከላከያ ምስክሮች እንዳሉዋቸው ለፍርድ ቤቱ በማስረዳታቸው፣ ከኅዳር 22 ቀን 2007 ዓ.ም. ጀምሮ የመከላከያ ምስክሮቻቸውን እንዲያሰሙ ቀጠሮ ይዟል፡፡