Print this page
28 September 2014 Written by  EthiopianReporter

እስላማዊ መንግሥት ለማቋቋም ሲንቀሳቀሱ ተደርሶባቸዋል የተባሉ ተጠርጣሪዎች ክስ ተመሠረተባቸው

-  ከደቡብ አፍሪካው አሸባሪ ቡድን ጋር ግንኙነት አላቸው ተብሏል

ጀሃዳዊ ጦርነት በማወጅና ማኅበራዊና ኢኮኖሚያዊ ተቋማትን በማናጋት እስላማዊ መንግሥት ለማቋቋም ሲንቀሳቀሱ ተደርሶባቸዋል ተብለው፣ ከዓመት በፊት በቁጥጥር ሥር ውለው በእስር ላይ በነበሩ ሰባት ተጠርጣሪዎች ላይ መስከረም 16 ቀን 2007 ዓ.ም. ክስ ተመሠረተ፡፡

ተጠርጣሪዎቹ በኦሮሚያ ክልል ጅማና ምዕራብ ሐረርጌ ዞን ነዋሪ መሆናቸው በክሱ የተገለጸው ጃፋር መሐመድ፣ መሐመድ ኑር ግዛው፣ ዓሊ መሐመድ ሳኒ፣ መህዲን ጀማል ያሲን፣ መሐመድ አባቢያ፣ አንዋር ትጃኔና ሼክ ከማል አባጭብሳ ናቸው፡፡

የፌዴራል ዓቃቤ ሕግ ለፌዴራል ከፍተኛ ፍርድ ቤት ተረኛ ችሎት ያቀረበው የክስ ዝርዝር እንደሚያስረዳው፣ ሁሉም ተጠርጣሪዎች እስላማዊ መንግሥት ለማቋቋም ሲንቀሳቀሱ ተደርሶባቸዋል፡፡

አንደኛ ተከሳሽ ሆኖ የተጠረጠረው ጃፋር መሐመድ በደቡብ አፍሪካ በተቋቋመው የሽብር ቡድን አባል በሆነውና ባልተያዘው ግብረ አበሩ በመሐመድ ዋግበር በ2005 ዓ.ም. መመልመሉን ክሱ ያስረዳል፡፡ ጃፋር ከደቡብ አፍሪካ ወደ ኢትዮጵያ ሲመለስ ‹‹ሃይማኖታዊ ጦርነት ማወጅና እስላማዊ መንግሥት ማቋቋም›› የሚል ዓላማ ይዞ መምጣቱን ክሱ ላይ ሰፍሯል፡፡ 

ተጠርጣሪው በግንቦት 2006 ዓ.ም. ጅማ ከተማ በመሄድ ሌሎች ግለሰቦችንም መመልመሉን፣ በደቡብ አፍሪካ የተመሠረተው የሽብር ቡድን አመራር ከሆነው መሐመድ ዋግበር በኢትዮጵያ ንግድ ባንክና በኦሮሚያ ኢንተርናሽናል ባንክ በኩል የተላከለትን ገንዘብ ተቀብሎ መጠቀሙን ክሱ ይገልጻል፡፡

ጃፋር የመለመላቸው አባላት በጅማ ዞን ኦሞናዳ ቀበሌ ውስጥ በሚገኝ ኮዳ በሚባል ጫካ ውስጥ ለስድስት ቀናት ወታደራዊ ሥልጠና መውሰዳቸው በክሱ ተካቷል፡፡ ለሥልጠና የመረጣቸው ቦታዎች የሰዎች እንቅስቃሴ ያለበት መሆኑን ስለተረዳም፣ ወደ ሶማሊያ በመሄድ ከአልሸባብ ጋር ለመቀላቀል በመጓዝ ላይ እያለ በግንቦት 2006 ዓ.ም. በቁጥጥር ሥር መዋሉን የዓቃቤ ሕግ ክስ ያስረዳል፡፡

ሁለተኛ ተከሳሽ የሆነው መሐመድ ኑር ግዛው የተባለው ተጠርጣሪም የደቡብ አፍሪካው የሽብር ቡድን መሪ ነው ከተባለው አብዲ ሁሴን 10,000 የደቡብ አፍሪካ ራንድ ተቀብሎ ወደ ሶማሊያ በመሄድ ከአልሸባብ ጋር ለመቀላቀል ሲል፣ በተመሳሳይ ሁኔታ በኢትዮጵያ ፀጥታ ኃይሎች በቁጥጥር ሥር መዋሉን ክሱ ያብራራል፡፡

ሌሎቹም ተጠርጣሪዎች በተመሳሳይ ወንጀል መጠርጠራቸውን፣ አባል በመሆን ገንዘብ በመቀበል የሽብር ተልዕኮ በመቀበል ለመታጠቅና እስላማዊ መንግሥት የማቋቋም ዓላማ በማንገብ፣ በህቡዕ ሲንቀሳቀሱ በቁጥጥር ሥር በመዋላቸው በዋና ወንጀል ተካፋይ በመሆንና በፈጸሙት የሽብርተኝነት ቡድን ውስጥ በመሳተፍ ወንጀል መከሰሳቸውን ክሱ ያስረዳል፡፡

ተጠርጣሪዎቹ በአማርኛ ቋንቋ የማይግባቡ በመሆናቸው በየዕለቱ አስተርጓሚ ስለሌለ፣ ጥቅምት 3 ቀን 2007 ዓ.ም. በግልም ሆነ መንግሥት በሚያቆምላቸው ጠበቃ ተወክለውና አስተርጓሚ ተመድቦላቸው ክሱን ለመስማት ፍርድ ቤቱ ቀጠሮ ሰጥቷል፡፡