28 September 2014 Written by  EthiopianReporter

በጋምቤላ ግጭት የተጠረጠሩ 15 የክልሉ መንግሥት የሥራ ኃላፊዎች በቁጥጥር ሥር ዋሉ

በጋምቤላ ብሔራዊ ክልል በመዠንገር ዞን ውስጥ የተከሰተው የእርስ በርስ ግጭት ውስጥ ተሳታፊ ነበሩ ተብለው የተጠረጠሩ 15 የክልሉ መንግሥት የሥራ ኃላፊዎች በቁጥጥር ሥር መዋላቸውን ምንጮች ገለጹ፡፡

የመከላከያ ሠራዊት፣ የፌዴራል ፖሊስና የክልሉ መንግሥት የፀጥታ ኃይል በቅንጅት ባደረጉት ምርመራ ለብጥብጥ ዋነኛ ተሳትፎ ነበራቸው የተባሉ 15 የሥራ ኃላፊዎች፣ እንዲሁም ከእነዚህ ባለሥልጣናት ጋር ቁርኝት ያላቸው ተጠርጣሪዎች በቁጥጥር ሥር መዋላቸውን ምንጮች ገልጸዋል፡፡

የፌዴራል ጉዳዮች ሚኒስትር ዶ/ር ሽፈራው ተክለ ማርያም ጉዳዩን በቀጥታ የተከታተሉት መሆኑን የሚኒስቴሩ የሕዝብ ግንኙነት ኃላፊ ለሪፖርተር አስረድተዋል፡፡ የሥራ ኃላፊው አቶ አበበ ወርቁ እንደገለጹት፣ የክልሉ መንግሥት መዋቅር ውስጥ ሆነው ብጥብጡን ሲያቀጣጥሉ የነበሩ ከአሥር በላይ የሥራ ኃላፊዎች በቁጥጥር ሥር መዋላቸውን አረጋግጠዋል፡፡ ይሁን እንጂ በምን ዓይነት የሥራ ኃላፊነት ላይ ያሉ መሆናቸውንና ማንነታቸውን ለመናገር የተሟላ መረጃ እንዳልደረሳቸው ተናግረዋል፡፡ 

በአሁኑ ወቅት የመከላከያ ሠራዊት፣ የፌዴራል ፖሊስና የክልሉ ፀጥታ ኃይል በጋራ በመሆን ኅብረተሰቡን በማረጋጋት ላይ መሆናቸውን፣ በብጥብጡ ምክንያት ከአካባቢው የተፈናቀሉ ነዋሪዎችን የመመለስ ሥራ ቅድሚያ ተሰጥቶት እየተሠራ መሆኑን አቶ አበበ አስረድተዋል፡፡

አንዳንድ ምንጮች እንደሚሉት የመዠንገር ዞን የፖሊስ አዛዥና አባላት ዋነኛ ተሳትፎ እንደነበራቸው ይገልጻሉ፡፡

ግጭቱ የተቀሰቀሰው ከዘመን መለወጫ ዋዜማ ጀምሮ መሆኑን የሚናገሩት ምንጮች፣ ከ40 በላይ ሰዎች መገደላቸውን ያስረዳሉ፡፡ የሟቾችን ቁጥር በተመለከተ የተጠየቁት የፌዴራል ጉዳዮች ሚኒስቴር ሕዝብ ግንኙነት ኃላፊ የቁጥር መረጃ እንደሌላቸው፣ በአሁኑ ወቅት የማረጋጋት ሥራ ብቻ በዋናነት ትኩረት እንደተሰጠውና በቀጣይ የግጭቱ ምንጭ ምን እንደሆነና ተሳታፊዎቹን የማጣራት ሥራ ይሠራል ብለዋል፡፡

ግጭቱ ተቀሰቀሰ የሚባለው የክልሉ ‹‹ነባር ነዋሪዎች ነን›› በሚሉት መዠንገሮችና ከሌላ አካባቢ መጡ ባሏቸው ደገኞች መካከል መሆኑን ምንጮች ገልጸዋል፡፡    

ከዚህ ቀደም ‹‹ደገኞች›› ለመንግሥት ያቀረቧቸው አቤቱታፖዋች ምላሽ ባለማግኘታቸው በመዥንገር ‹‹ነባር ነዋሪዎች›› ግጭቱ መፈጠሩን የሚገልጹ የዓይን እማኞች መንግሥት ከጥቃት እንዲታደጋቸው መጠየቃቸውን መዘገባችን ይታወሳል፡፡ በግጭቱ የቅርብ ጊዜ ክስተትም ‹‹ደገኞች›› ራሳቸውን በመከላከልና የበቀል ዕርምጃ በመውሰድ ተሳታፊ ናቸው መባላቸውን መዘገባችንም ይታወሳል፡፡