28 September 2014 Written by  EthiopianReporter

የንግድ ባንክ አምስት ሥራ አስኪያጆች በሙስና ወንጀል ተጠርጥረው ታሰሩ

-  የተጠረጠሩት ከኦሮሚያ ውኃ ማዕድንና ኢነርጂ ቢሮ ሒሳብ ጋር በተገናኘ ነው

የኢትዮጵያ ንግድ ባንክ በአዲስ አበባ ቅርንጫፍና በባምቢስ ቅርንጫፍ የሚሠሩ አምስት ሥራ አስኪያጆች በሙስና ወንጀል ተጠርጥረው ታሰሩ፡፡

መስከረም 16 ቀናት 2007 ዓ.ም. ፍርድ ቤት ቀርበው የ14 ቀን ተጨማሪ የምርመራ ጊዜ ተጠይቆባቸው ፍርድ ቤቱ ፈቅዷል፡፡

ተጠርጣሪዎቹ የኢትዮጵያ ንግድ ባንክ አዲስ አበባ ቅርንጫፍ የደንበኞች አገልግሎት ሥራ አስኪያጆች አቶ መላክ ደጀኔና አቶ ጋሻው ኃይሌ፣ የባምቢስ ቅርንጫፍ ደንበኞች አገልግሎት ሥራ አስኪያጅ አቶ ስማቸው በዜ፣ በባምቢስ ቅርንጫፍ የውስጥ ተቆጣጣሪ ሥራ አስኪያጅ አቶ ዘበነ አበራና በአዲስ አበባ ቅርንጫፍ የደንበኞች አገልግሎት መኮንን አቶ ጋሻው ደገፉ ናቸው፡፡

የፌዴራል የሥነ ምግባርና የፀረ ሙስና ኮሚሽን መርማሪ ቡድን ተጠርጣሪዎቹን ለፌዴራል ከፍተኛ ፍርድ ቤት ተረኛ ችሎት አቅርቦ እንዳስረዳው ተጠርጣሪዎቹ የኦሮሚያ ውኃ፣ ማዕድንና ኢነርጂ ቢሮ በኢትዮጵያ ንግድ ባንክ አፍሪካ አንድነት ቅርንጫፍ ካለው ሒሳብ ላይ፣ በተለያዩ ለሁለት ጊዜያት 750 ሺሕ ብር እና ከ1.8 ሚሊዮን ብር በላይ ወጪ አድርገዋል፡፡ 

ተጠርጣሪዎቹ ለሁለት ጊዜያት ያወጡትን የቢሮውን ገንዘብ ‹‹ሥራህ ኮምፒዩተር አክሰሰሪ›› በማለት አቶ ፈሪድ ጀማል ሁሴን በሚባሉ ግለሰብ በተከፈተ ሒሳብ በማዛወር፣ በድምሩ ከ2.5 ሚሊዮን ብር በላይ ወጪ መደረጉን ለፍርድ ቤቱ አስረድቷል፡፡

የኦሮሚያ ውኃ፣ ማዕድንና ኢነርጂ ቢሮ ገንዘቡ ተጭበርብሮ መውጣቱን በማወቁ ለኢትዮጵያ ንግድ ባንክ ማመልከቱን መርማሪ ቡድኑ አስረድቶ፣ ማመልከቻ የደረሰው የኢትዮጵያ ንግድ ባንክ የባንቢስ ቅርንጫፍ ሒሳብ እንዳይንቀሳቀስ ማገዱንም አክሏል፡፡ በመሆኑም ተጠርጣሪዎቹ የባንኩን ሥራ አፈጻጸም ከመመርያ ውጪ ገንዘቡ እንዲተላለፍ በማድረጋቸው፣ በመንግሥት ላይ ከፍተኛ ጉዳት እንዲደርስ ማድረጋቸውን በመግለጽ ተጨማሪ ሰነዶች፣ ምስክሮችና ሌሎች ማስረጃዎችን መሰብሰብ እንደሚቀረው በማስረዳት ለተጨማሪ ምርመራ 14 ቀናት ጊዜ ጠይቋል፡፡

ተጠርጣሪዎቹ በበኩላቸው ፖሊስ ደርሼበታለሁ ያለውን ማስረጃ ሰብስቦ በመጨረሱ፣ ተጨማሪ ጊዜ መስጠት ሳያስፈልግ የዋስትና መብታቸው እንዲከበርላቸው ጠይቀዋል፡፡ መርማሪ ቡድኑ የተጠረጠሩበት የሙስና ወንጀል በመሆኑና ዋስትናም የሚያስከለክል መሆኑን በመግለጽ የሚያቀርቡት ዋስትና ውድቅ እንዲደረግለት ጠይቋል፡፡ 

ፍርድ ቤቱ የተጠርጣሪዎቹን የዋስትና ጥያቄ በማለፍ፣ የኮሚሽኑ መርማሪ ቡድን የጠየቀውን የ14 ቀናት ተጨማሪ የምርመራ ጊዜ በመፍቀድ ለመስከረም 29 ቀን 2007 ዓ.ም. ቀጠሮ ሰጥቷል፡፡