Print this page
27 May 2014 Written by  EthiopianReporter

በአዳራሽ አለመመቸት ምክንያት የእነ አቶ መላኩ ፈንታ ብይን ተላለፈ

ከልደታ ምብድ ችሎት ወደ አቃቂ ቃሊቲ ምድብ ችሎት ተዘዋውሮ ግንቦት 15 ቀን 2006 ዓ.ም. ብይን ይሰጣል ተብሎ የተጠበቀው የእነአቶ መላኩ ፈንታ የክስ ጉዳይ፣ የችሎቱ አዳራሽ በመጥበቡ ምክንያት ለግንቦት 22 ቀን 2006 ዓ.ም. ተቀየረ፡፡

በከባድ የሙስና ወንጀል ተጠርጥረው ላለፈው አንድ ዓመት በእስር ላይ የሚገኙት አቶ መላኩ ፈንታንና አቶ ገብረዋህድ ወልደጊዮርጊስን ጨምሮ፣ ነጋዴዎች፣ ባለሀብቶች፣ የጉምሩክ አስተላላፊዎችና ሠራተኞች ላይ ብይን እንደተሠራና ግንቦት 15 ቀን 2006 ዓ.ም. እንደሚሰጥ በመታመኑ፣ የችሎቱ ታዳሚዎች በችሎቱ የተገኙት ቀደም ብለው ነበር፡፡ 

ፍርድ ቤቱም ሆነ ታዳሚዎቹ በሰዓቱ የደረሱ ቢሆንም፣ ችሎቱ በጣም ጠባብ በመሆኑ ቤተሰብም ሆነ ሚዲያው መግባት እንደማይችሉ የተነገራቸው በፖሊስ አማካይነት ነበር፡፡ 

ለአንድ ዓመት ያህል በግልጽ ችሎት ሲታይ የከረመን ጉዳይ ለምን በብይን በዝግ እንዲታይ ይደረጋል በሚል ከጋዜጠኞችና ከታዳሚዎች ማጉረምረም እየበዛ ሲሄድ፣ ጋዜጠኞች እንዲገቡ ተፈቅዶ ነበር፡፡ ነገር ግን ችሎቱ ከመጥበቡም በላይ ድምፅ ስለሚያስተጋባ፣ ፍርድ ቤቱ ብይኑን በዕለቱ መስጠት እንደማይችል አስታውቋል፡፡ ምክንያቱ ደግሞ ችሎቱ ጠባብ በመሆኑና የጉዳዩ ባለቤቶችም ሆኑ ታዳሚዎች በአግባቡ መከታተል ስለማይችሉ ነው፡፡ 

በግልጽ ችሎት ሲታይ የከረመን ጉዳይ ብይኑም በግልጽ ችሎት መታየት ስለሚገባው፣ ለተጠርጣሪዎችም ሆነ ለታዳሚዎች በማያመች ቦታ ብይኑን ለመንገር የፍርድ ቤቱም ፍላጐት ባለመሆኑ፣ በሌላ ቀጠሮ ለማየት መገደዱን በመግለጽ ለግንቦት 22 ቀን 2006 ተለዋጭ ቀጠሮ ሰጥቶ አብቅቷል፡፡ በፍርድ ቤቱ ትዕዛዝ ታዳሚዎች ደስተኛ ሆነው ታይተዋል፡፡