14 May 2014 Written by  Ethiopianreporter

ከመሬት ጋር በተያያዘ ሙስና የተጠረጠሩ 12 ግለሰቦች ላይ ክስ ሊመሠረት ነው

-በሚሊዮን የሚቆጠሩ ገንዘቦችና ንብረቶች ታግደዋል

የሥነ ምግባርና ፀረ ሙስና ኮሚሽን ከመሬት ባለይዞታነት ጋር የተገናኘ ሙስና ፈጽመዋል ብሎ በጠረጠራቸው 12 ግለሰቦች ላይ ክስ ሊመሠርት መሆኑን አስታወቀ፡፡

ኮሚሽኑ ለሕዝብ ተወካዮች ምክት ቤት ባቀረበው የ10 ወራት የሥራ አፈጻጸም ሪፖርት እንደገለጸው፣ ሐሰተኛ የመሬት ባለይዞታነት መረጃ በማዘጋጀትና ሕጋዊ ቅድመ ሁኔታ ላላሟሉ ሰዎች የመንግሥት መሬት አላግባብ በመስጠት የተጠረጠሩ 12 ግለሰቦች ላይ ምርምራ አካሂዶ ለዓቃቤ ሕግ ውሳኔ አቅርቧል፡፡

በምርምራ በተሰበሰበ ማስረጃ ግምቱ ከ203.5 ሚሊዮን ብር በላይ የሆነ 155,208 ካሬ ሜትር የመንግሥት መሬት ያላግባብ በግለሰቦች የተያዘ መሆኑን ሪፖርቱ ያስረዳል፡፡

በሌላ በኩል ከታክስ ጋር የተያያዙ 10 ጉዳዮች ላይ ምርመራ በመካሄድ ላይ መሆኑን፣ እንዲሁም ከመንግሥት ትላልቅ የግዥና የሽያጭ ሥርዓት ጋር በተያያዘ 14 ጥቆማዎች መቅረባቸውን፣ ከእነዚህም ውስጥ በአምስቱ ላይ ክስ መመሥረቱን ሪፖርቱ ያስረዳል፡፡

በቀሪዎቹ ዘጠኝ ጥቆማዎች ላይ የምርመራ ሥራ እየተከናወነ እንደሚገኝ የሚገልጸው ሪፖርቱ፣ ከጨረታ ሕግ ውጪ ግዥ መፈጸም፣ ሐሰተኛ ሲፒኦ በማቅረብ ቅድመ ክፍያ ይዞ መሰወር፣ ሐሰተኛ ሰነድ ለውድድር መጠቀምና ከመሳሰሉት ጉዳዮች ጋር በተያያዘ 40.5 ሚሊዮን ብር የሚገመት የመንግሥት ሀብት ያለአግባብ ወጪ መደረጉን ያመለክታል፡፡

በመንግሥት ባንኮች ያለበቂ መያዣ ብድር በሰጡ ላይም ምርምራ በመካሄድ ላይ እንደሚገኝ ሪፖርቱ ያስረዳል፡፡

በአሥር ወራት ውስጥ ከሙስና ጋር ከተያያዙ ጉዳዮች ጋር ግንኙነት ያላቸውን ሀብቶች በፍርድ ቤት ማሳገድ እንደተቻለ ሪፖርቱ ይገልጻል፡፡ በዚህም መሠረት 152 ተሽከርካሪዎች፣ 137 መኖሪያ ቤቶች፣ ሦስት ሕንፃዎች፣ አንድ ፋብሪካ፣ 319.9 ሚሊዮን ብር፣ 19.3 ሚሊዮን የአክሲዮን ብር፣ 18 ሚሊዮን የቦንድ ብር፣ አምስት የንግድ መደብሮችና 12 የነዳጅ መጫኛ ቦቴዎች መታገዳቸውን ሪፖርቱ ያስረዳል፡፡