07 May 2014 Written by  EthiopianReporter

በሐሰተኛ ሰነድ የቻይና ኩባንያንና ግለሰብ በማታለል የተጠረጠሩት ተቋራጭ ተከሰሱ

-የኦሮሚያ አንድ ቢሮና የከተማ ልማትና ኮንስትራክሽን ሚኒስቴርም ተታለዋል

የሕንፃ ተቋራጭነት ሙያ ሳይኖራቸው የማይገባ ብልፅግና ለማግኘት፣ ለሌላ ሰው ለማስገኘት በማሰብና ሙያ እንዳላቸው በማስመሰል ከከተማ ልማት፣ ቤቶችና ኮንስትራክሽን ሚኒስቴር የተሰጠ መሆኑን የሚገልጽ ሐሰተኛ ሰነድ በማሳየት፣

ከቻይናው ሲጂሲ ኦቨርሲስ ጋር ውል በመዋዋል፣ ከአንድ ግለሰብ አንድ ሚሊዮን ብር የሚጠጋ ገንዘብ በማታለል ወስደዋል የተባሉ ተጠርጣሪ በቁጥጥር ሥር ውለው ክስ ተመሠረተባቸው፡፡

ጠቅላላ ሥራ ተቋራጭ ደረጃ አምስት የሚል ንግድ ፈቃድ በማውጣት የቻይናውን ኩባንያ፣ የኦሮሚያ ሥራና ከተማ ልማት ቢሮ፣ የየካ ክፍለ ከተማ ንግድና ኢንዱስትሪ ልማት ቢሮን፣ የከተማ ልማት፣ ቤቶችና ኮንስትራክሽን ሚኒስቴርንና አቶ ምሥጋናው ተፈራ የተባሉትን ግለሰብ በማታለል ተጠርጥረው ክስ የተመሠረተባቸው፣ ነዋሪነታቸው በኦሮሚያ ክልል በባሌ ጐባ ከተማ  መሆኑ የተጠቀሰው ተቋራጭ አቶ ጐሣዬ ለገሰ የተባሉ ግለሰብ መሆናቸውን ክሱ ያስረዳል፡፡

ተጠርጣሪው መግለጽ የሚገባቸውን ነገር በመደበቅ ከኦሮሚያ ሥራና ከተማ ልማት ቢሮ በ20/02/2005 ዓ.ም. የተሰጠ መሆኑን የሚገልጽ ሐሰተኛ ‹‹በጠቅላላ ሥራ ተቋራጭነት ደረጃ አምስት›› መመዝገቡን የሚያረጋግጥ የሙያ ብቃት ማረጋገጫ ፈቃድ ለየካ ክፍለ ከተማ ንግድና ኢንዱስትሪ ልማት ቢሮ ያቀርባሉ፡፡ የሕንፃ ተቋራጭነት ሙያ ሳይኖራቸው እንዳላቸው በማስመሰልና ከከተማ ልማት፣ ቤቶችና ኮንስትራክሽን ሚኒስቴር የተሰጠ በማስመሰልም የብቃት ማረጋገጫ ማውጣታቸውንም የፌዴራል ዓቃቤ ሕግ ሚያዝያ 2 ቀን 2006 ዓ.ም. ለፌዴራል ከፍተኛ ፍርድ ቤት ቦሌ ምድብ ችሎት ያቀረበው ክስ ያስረዳል፡፡

ግለሰቡ የሙያ ማረጋገጫዎቹን ከመንግሥት ተቋማት የተሰጣቸው በማስመሰል፣ የግል ተበዳይ ናቸው ለተባሉት አቶ ምሥጋናው ያሳዩአቸውና እሳቸው በሙያቸው አቶ ምሥጋናው ደግሞ በንግድ ፈቃድና በገንዘባቸው በሽርክና እንዲሠሩ እንዳግባቧቸው ክሱ ያስረዳል፡፡

ተጠርጣሪው የግል ተበዳዩን ያነጋገሯቸው ያላቸውን የሙያ ብቃት ማረጋገጫ ሰርተፊኬትና ከቻይናው ሲጂሲ ኦቨርሲስ ድርጅት ጋር የኮንስትራክሽን ሥራ ለመሥራት የተዋዋሉበትን ሰነድ በማሳየትና ገንዘብ እንዳጠራቸው በመግለጽ መሆኑን ክሱ ይገልጻል፡፡

‹‹ተደራጅተን ብንሠራ ትርፋማ እንሆናለን›› በማለት ተጠርጣሪው የግል ተበዳይ ናቸው የተባሉትን አቶ ምሥጋናውን ካግባቡዋቸው በኋላ፣ ተበዳዩ እምነት እንዲያድርባቸው አድርገው ከቻይናው ኩባንያ ጋር የተፈራረሙበትን ሥራ ለመጀመር የሚያስፈልጉትን ዕቃዎች እንዲሟሉ ያደርጋሉ፡፡

ተጠርጣሪው የግል ተበዳዩን ካሳመኑ በኋላ ለዶዘርና ለሎደር ኪራይ፣ ለሠራተኞች አገልግሎት፣ ለባንክ ዋስትናና ለሲጂሲ ኦቨርሲስ ለነዳጅ፣ ወዘተ በድምሩ 910,025 ብር እንዲያወጡ በማድረጋቸው፣ በከባድ የማታለል ወንጀልና ሐሰተኛ የምስክር ወረቀቶችን መገልገል ወንጀል ክስ ተመሥርቶባቸዋል፡፡ ዋስትና ተከልክለው በማረሚያ ቤት እንዲቆዩም ተደርጓል፡፡ የክስ መቃወሚያና የእምነት ክህደት ቃል ለመቀበልም ተለዋጭ ቀጠሮ ተሰጥቷል፡፡