Print this page
02 May 2014 Written by  FanaBC

የግል ድርጅቶት የስራ ሃላፊዎች የሚጠየቁበት የስነምግባር ደንብ ስራ ላይ ሊውል ነው

የግል ድርጅቶችን የስራ ሁኔታን የሚቆጣጠሩ  የስራ ሃላፊዎች የሚጠየቁበት የስነምግባር ደንብ ስራ ላይ ሊውል ነው። የሰራተኛና ማህበራዊ ጉዳይ ሚኒስቴር በአዋጅ ከ10 ሰራተኞች በላይ ቀጥረው የሚያስተዳድሩ የግል ድርጅቶች እና የመንግስት የልማት ድርጅቶችን ነው ተደራሽ አድርጎ የሚሰራው ።

እነዚህን በሀገሪቱ የሚገኙ ድርጅቶች የስራ ሁኔታ የሚከታተሉ ተቆጣጣሪዎችም ከዋናው መስሪያ ቤት እስከ ቅርንጫፎች  ተደራጅተዋል። ይሁንና በዘርፉ የተሰማሩ 291 የሚሆኑ የስራ ሁኔታ ተቆጣጣሪዎች ተጠያቂ የሚሆኑበት የስነምግባር ደንብ እስካሁን ያለመኖሩን ነው ፥በሰራተኛና ማህበራዊ ጉዳይ ሚኒስቴር የስራ ሁኔታዎች ቁጥጥር አገልግሎት ቡድን መሪ አቶ ፍጹም ገብረሚካኤል የተሚናገሩት።

እነዚህ ተቆጣጣሪዎች ከፍተኛ ሃላፊነት የተጣለባቸው ሲሆን ፥ በማናቸውም የስራ ሰዓት ሳያስታውቁ  በፈለጉበት የስራ ቦታ ተንቀሳቅሰው ቁጥጥር ማካሄድ ፣ የሚፈልጓቸውን መረጃዎች በጽሁፍ በድምጽና በምስል እስከመውሰድ የሚችል ስልጣና እንዳላቸው በአዋጅ ተደንግጓል።

ታዲያ አዋጁ ይሄን ሁሉ ስልጣን  ይስጣቸው እንጂ ከሃላፊነታቸው ጋር የሚመጣጠን የሙያ ስነምግባር  ሳይወጣ ቆይቶ እንደነበር ነው ያወሱት አቶ ፍጹም ፥ በአሁኑ ጊዜ  የስነምግባር ደንቡ ረቂቅ ተዘጋጅቶ  የባለድርሻ አካላት አስተያየት ብቻ እየተጠበቀ እንደሚገኝ ተናግረዋል።

በደንቡ  ተቆጣጣሪው የራሱ ንብረት ወይም የጥቅም ተጋሪ በሆነበት ድርጅት ላይ እንዳይቆጣጠር ያደርጋል የሚለው በቀዳሚነት የሰፈረ ሲሆን ፥ ሌላ ባለደረባው ባልተገባ ስነምግባር ቢገኝ ሊያስተካክለውና ሊያጋልጠው እንደሚገባም ይጠቅሳል ደንቡ።

ተቆጣጣሪዎች የተሰጣቸውን ይህንን  ትልቅ ሃላፊነት መከታ አድርገው ከአሰሪዎች ጋር ያልተገባ የጥቅም ትስስር ሊፈጥሩ ይችላሉ የሚል ምልክት መታየቱን የገለፁት አቶ ፍጹም ፥ የሙያ ስነምግባር ደንቡ በቀዳሚነት መልካም አስተዳደርን ለማስፈን መዘጋጀቱንም ነው የጠቀሱት።

ደንቡ በዋናነት ሰራተኞች በአሰሪዎቻቸው ያልተገባ በደል እንዳይፈጸምባቸው የሚረዳ ሲሆን ፥ ተቆጣጣሪዎች ይህ ደንብ በራሳቸው ጥሰት ሲገጥመውም ከደሞዝ ቅጣት እስከ ስራ ማሰናበት ድረስ እርምጃ ሊያስወስድ ይችላል ተብሏል።

የስራ ሁኔታ ተቆጣጣሪ ባለሙያዎች  የሙያ ስነምግባር ደንብ በሚቀጥለው አመት የመጀመሪያ ሩብ አመት  ወደ ተግባር የሚሸጋገር ሲሆን ፥ ደንቡ ለተቆጣጣሪዎች ከሚያስቀምጠው የግልጸኝነትና የተጠያቂነት አሰራር ጋር በተያየዘ ፤ ሰራተኞች የደከሙበትን የላባቸውን ዋጋ በአግባቡ እንዲያገኙና ኢንዱስትሪው ላይ ሄድ መጣ የሚሉ የመልካም አስተዳደር ግድፈቶችን ይቀርፋል የሚል እምነት ተጥሎበታል ።