30 April 2014 Written by  EthiopianReporter

ፓርላማው የ63 ዳኞችን ሹመት አፀደቀ

የሕዝብ ተወካዮች ምክር ቤት በጠቅላይ ሚኒስትር ኃይለ ማርያም ደሳለኝ የቀረቡ 63 ዕጩ ዳኞችን ሹመት ሚያዝያ 21 ቀን 2006 ዓ.ም. አፀደቀ፡፡

የተሿሚ ዳኞቹ ቁጥር የበዛው የፍትሕ ሥርዓቱን የበለጠ ቀልጣፋ ለማድረግ ነው ተብሏል፡፡

የሕግ መምህራንን በመመልመልና በማሠልጠን ለዕጩ ዳኝነት እንዲበቁና እንዲሾሙለት ለጠቅላይ ሚኒስትሩ የማቅረብ ሕጋዊ ኃላፊነት የተሰጠው የዳኞች አስተዳደር ጉባዔ ነው፡፡ ጉባዔው ለፌዴራል መጀመሪያ ደረጃ ፍርድ ቤትና ለፌዴራሉ ከፍተኛ ፍርድ ቤት መልምሎ ያጫቸውን ዳኞች ጠቅላይ ሚኒስትሩ በማፅደቅ በፓርላማ እንዲያሾሙ ሚያዝያ 8 ቀን 2006 ዓ.ም. በደብዳቤ ጠይቋል፡፡

የፌዴራል ዳኞች አስተዳደር ጉባዔ የላከው ደብዳቤ እንደሚያስረዳው፣ ዕጩ ዳኞቹ በዳኝነት ሙያ ለመሰማራት ፈቃደኛ የሆኑ፣ በአዋጁ መሠረት ለየደረጃው ፍርድ ቤቶች የሚፈለገውን ዕድሜና የሥራ ልምድ ያሟሉ፣ በሕግ ትምህርት በመጀመሪያ ዲግሪና አንዳንዶቹም በሁለተኛ ዲግሪ የተመረቁና የዳኝነት ቅድመ ሥልጠና የወሰዱ፣ እንዲሁም ለሕገ መንግሥቱ ታማኝና በሥነ ምግባራቸውም መልካም ባህሪ ያላቸው መሆኑ መረጋገጡን ያስረዳል፡፡ 

የዳኞች አስተዳደር ጉባዔ ያቀረባቸውን ዕጩዎች የተመለከቱት ጠቅላይ ሚኒስትር ኃይለ ማርያም ለሕዝብ ተወካዮች ምክር ቤት በላኩት ደብዳቤ፣ የዳኞች አስተዳደር ጉባዔ በጠየቀው መሠረት 29 ዕጩ ዳኞች ለፌዴራል ከፍተኛ ፍርድ ቤት፣ የተቀሩት 34 ዕጩ ዳኞችን ደግሞ ለፌዴራል የመጀመሪያ ደረጃ ፍርድ ቤት እንዲሾሙ ጠይቀዋል፡፡ ጠቅላይ ሚኒስትሩ የላኩት የዕጩ ዳኞች ሹመት ጥያቄ ላይ የተወያዩት የሕዝብ ተወካዮች ምክር ቤት አባላት ከዚህ ቀደም በርካታ ዳኞች ተሹመው የነበረ መሆኑን በማስታወስ፣ አሁን የበርካታ ዕጩ ዳኞች ሹመት እንዴት ሊቀርብ ቻለ ሲሉ ጠይቀዋል፡፡

የፌዴራል ዳኞች አስተዳደር ጉባዔ አባል፣ የጠቅላይ ሚኒስትሩ የፍትሕ አስተዳደር አማካሪና የፓርላማው የሕግና አስተዳደር ጉዳዮች ቋሚ ኮሚቴ ሰብሳቢ የሆኑት አቶ አስመላሽ ወልደ ሥላሴ ለቀረበው ጥያቄ በሰጡት ምላሽ፣ በርካታ ዳኞችን መሾም የተፈለገበት ምክንያት የፍትሕ ሥርዓቱን ቀልጣፋና ተደራሽ ለማድረግ ነው ብለዋል፡፡

በአሁኑ ወቅት በከፍተኛ ፍርድ ቤት በየችሎቱ አንድ ዳኛ ብቻ የሚያስችል መሆኑንና በከፍተኛ ፍርድ ቤት የሚቀርቡ ፋይሎች ብዛትና ከባድነት በአንድ ዳኛ ብቻ መታየት የሌለባቸው በመሆኑ፣ ይህንን ችግር ለመቅረፍ በርካታ ዳኞችን መሾም ተገቢ መሆኑ እንደታመነበት ገልጸዋል፡፡ በመሆኑም ከዚህ በኋላ በከፍተኛ ፍርድ ቤቶች ሦስት ዳኞች እንደሚያስችሉና ይህም መሆኑ ለፍትሕ ሥርዓቱ መቀላጠፍ ይረዳል ብለዋል፡፡

Last modified on Wednesday, 30 April 2014 17:45