09 April 2014 Written by  EthiopianReporter

የልጆቹን እናት በጥይት ደብድቦ ገድሏል የተባለው ተከሳሽ በዕድሜ ልክ ፅኑ እስራት ተቀጣ

ባለቤቱን ወ/ሮ ፍሬሕይወት ታደሰን በአሥር ጥይቶች ደረቷን፣ ጭንቅላቷን፣ ግንባሯን፣ ሆዷን፣ ጀርባዋን፣ ሁለት ታፋዎቿን፣ እጆቿንና የተለያዩ የሰውነት ክፍሏን በመምታት ጭካኔ በተሞላበት የግፍ አገዳደል ፈጽሟል በሚል፣ የፌደራል ዓቃቤ ሕግ የመሠረተበትን ክስ መከላከል ባለመቻሉ ተፈርዶበታል፡፡ ግለሰቡ ተመሥርቶበት በነበረው ሰባት ክሶች በሁሉም ጥፋተኛ በመባሉ በድምሩ 81 ዓመታት ከስድስት ወራት የሚያስቀጣው ቢሆንም፣ በኢትዮጵያ ሕግ ከ25 ዓመት በላይ መቅጣት ስለማይቻል በዕድሜ ልክ ፅኑ እስራት እንዲቀጣ የፌደራል ከፍተኛ ፍርድ ቤት ልደታ ምድብ 3ኛ ወንጀል ችሎት ወስኖበታል፡፡

የዕድሜ ልክ ፅኑ እስራት ፍርደኛው አቶ የወንድወሰን ይልማ ማንያህልሃል የሚባል ግለሰብ ሲሆን፣ ባለቤቱ ከነበረችው ወ/ሮ ፍሬሕይወት ታደሰ ጋር ባለመስማማታቸው ፍቺ ፈጽመው መለያየታቸውን መዘገባችን ይታወሳል፡፡

አቶ የወንድወሰን ፍርድ ቤት በሰጠው ውሳኔ መሠረት ልጆቹን በሳምንት አንድ ቀን ወስዶ ካዝናና በኋላ ለእናታቸው ሲያስረክብ ከዓመት በላይ የቆየ ቢሆንም፣ ጥቅምት 10 ቀን 2005 ዓ.ም. በዕለተ ቅዳሜ ግን ልጆቹን እንደተለመደው ወስዶ ማዝናናት ሳይሆን የፈጸመው ሌላ ድርጊት ነው፡፡

ዓቃቤ ሕግ ለፍርድ ቤቱ እንዳስረዳው ከሆነ ድርጊቱ የተፈጸመው ከሚከተለው ቅድምተከተል ነው፡፡ ሟች ወ/ሮ ፍሬሕይወት እናቷን ይዛ ካዛንቺስ መናኸሪያ አካባቢ ከሚገኘው የወላጆቿ ቤት በመነሳት በዮርዳኖስ ሆቴል አድርጋ የባምቢስን ድልድይ በማቋረጥ፣ ኦሎምፒያን አልፎ ወደሚገኘው የግል ድርጅቷ ለመሄድ የሆነውን መኪናዋን እያሽከረከረች ስትጓዝ ባምቢስ አካባቢ ሆኖ ሲጠባበቃት የነበረው ፍርደኛው የወንድወሰን ያያትና ይከተላታል፡፡ እሷም ዓይታው ስለነበር የመኪናዋን ፍጥነት በመጨመር ለማምለጥ ብትሞክርም፣ ኦሎምፒያን ተሻግራ ካርቱም ሬስቶራንት አካባቢን ማለፍ አልቻለችም፡፡ ምክንያቱም የወንድወሰን ይዞት የነበረው ተሽከርካሪ ፍጥነቱ አይሎ ከፊት ለፊቷ በማለፍ መንገዱን ስለዘጋባት ነው፡፡ በድንጋጤና ፍርኃት ውስጥ የነበረችው ሟች ፍሬሕይወት በእሷ በኩል ያለው በር አልከፈት ብሏት ስትታገል፣ ክላሽኒኮቭ ጠመንጃ ከተሽከርካሪው ውስጥ ይዞ የወጣው የወንድወሰን፣ ፍሬሕይወት ከተቀመጠችበት ጋቢና ሳትርቅ ደረሰባት፡፡

 ከላይ በተጠቀሱት የሟች የሰውነት ክፍሎች ላይ አሥር ጥይቆችን በማርከፍከፍ ከገደላት በኋላ፣ አብረዋት የነበሩትን እናቷንና ጓደኛዋን ለመምታት ቢሞክርም፣ በማምለጣቸው ፊቱን በአካባቢው በነበሩ ሰዎች ላይ አዞረ፡፡ ሕይወት ማጥፋት ባይችልም የተወሰኑ ሰዎችን ማቁሰሉን፣ የጥይቱ ጩኸት በመቋረጡ የያዘውን ጠመንጃ አፈሙዝ ወደራሱ አዙሮ ሲሞክረው ጥይቶቹ አልቀዋል፡፡ አቶ የወንድወሰን የመጨረሻ ዕድሉ እጁን ለፖሊስ መስጠት በመሆኑ በፖሊስ ቁጥጥር ሥር ውሎ ሰባት ክሶች የተመሠረቱበት ሲሆን፣ በሰባቱም ክሶች ጥፋተኛ በመባሉ የዕድሜ ልክ ፅኑ እስረኛ በመሆን መጋቢት 26 ቀን 2006 ዓ.ም. ወደ ማረሚያ ቤት ተልኳል፡፡ እናትና አባታቸውን ገና በጨቅላነታቸው ያጡት ሁለት ሕፃናትም ከሟች ፍሬሕይወት ቤተሰቦች ዘንድ ይገኛሉ፡፡