ፍርድ ቤቱ በሃና ላላንጎ የክስ መዝገብ ላይ ፖሊስ ምርመራውን በ14 ቀን ውስጥ እንዲያጠናቅቅ ትእዛዝ አስተላለፈ

FanaBC Dec 01 2014

በቅርቡ በቡድን ተደፍራ ህይወቷ ያለፈው የሃና ላላንጎ የምርመራ መዝገብ ባለመጠናቀቁ ፖሊስ ምርመራውን በ14 ቀን ውስጥ እንዲያጠናቅቅ የቂርቆስ የመጀምሪያ ደረጃ ፍርድ ቤት አራተኛ ምድብ የወንጀል ችሎት ትእዛዝ አስተላልፏል።

ፍርድ ቤቱ ትእዛዙን ያስተላለፈው ዛሬ በዋለው ችሎት ፖሊስ ምርመራውን ለማካሄድ ተጨማሪ ጊዜ በመጠየቁ ነው።

የዛሬው ቀጠሮም በዝግ ችሎት ነው የታየው።

የቂርቆስ ምድብ ችሎት የመጀምሪያ ፍርድ ቤት ለፋና ብሮድካስቲን ኮርፖሬት እንደተናገረው፥ ቸሎቱን በዝግ ማካሄድ ያስፈለገው በአሁኑ ጊዜ የተለያዩ መገናኛ ብዙሃን ጉዳዩን አስመልክቶ የሚያወጡት መረጃ የምርመራ ስራው ላይ እንቅፋት እየሆነ በመምጣቱ ነው።

በተለይም አንዳንድ የውጭ መገናኛ በዙሃን ጉዳዩን አስመልክቶ የሚያቀርቡት ዘገባ በፍርድ ቤቱ ስራ የመግባት ያህል እየሆነ በመምጣቱ ነው የሚለውም ተጠቅሷል።

ከዚህ በተጨማሪም ለተጠርጣሪዎቹ ደህንነት ሲባልና የተፈጸመው ወንጀል ሰቅጣጭና አስከፊ በመሆኑ ችሎቱ በዝግ እንዲታይ ካደረጉ ምክንያቶች ውስጥ ተጠቃሾች ናቸው።

ፍርድ ቤቱ ህዳር 10 ቀን በዋለው ችሎት ፖሊስ መረጃውን አጠናቆ ለዛሬ እንዲቀርብ ተለዋጭ ቀጠሮ ሰጥቶ ነበር።

ምርመራውን እያከናወነ ያለው ፖሊስ እስካሁን ባለው ሂደት የህክምና ውጤቱ የተጠናቀቀ ሲሆን የሰው ማስረጃዎችና የአስክሬን ምርመራ ውጤት አልተጠናቀቀም ብሏል።

በዚህም መሰረት የአዲስ አበባ ከተማ የመጀመሪያ ደረጃ ፍርድ ቤት የቂርቆስ ምድብ አራተኛ የወንጀል ችሎት የፖሊስን ጥያቄ በመቀበል ምርመራውን በተጨማሪ 14 ቀን ውስጥ አጠናቆ እንዲቀርብ ትእዛዝ አስተላልፏል።

ከዚህ ጋር ተያይዞም ፍርድ ቤቱ ማንኛውም የመገናኛ ብዙሃን ለምርመራ ሂደቱ እንቅፋት በሚሆን ደረጃ ዘገባዎችን ከመዘገብ እንዲቆጠቡ ጥሪ አቅርቧል።

Read 34654 times Last modified on Dec 01 2014