Print this page

የፌዴራል የመጀመሪያ ፍርድ ቤት ምክትል ፕሬዚዳንቶችና ዳኞች ሹመት ፀደቀ

EthiopianReporter Jun 25 2014

ፓርላማው በጠቅላይ ሚኒስትሩ የቀረቡለትን የፌዴራል የመጀመሪያ ፍርድ ቤት ምክትል ፕሬዚዳንቶችና ዳኞች ሹመት አፀደቀ፡፡ የተሿሚዎች የብሔር ተዋጽኦ በፓርላማው አባላት ተነስቷል፡፡

በሕገ መንግሥቱ ጠቅላይ ሚኒስትሩ የዳኞችን ሹመት የማቅረብ ኃላፊነት የተጣለባቸው ሲሆን በዚሁ መሠረት ባለፈው ማክሰኞ ሁለት የፌዴራል የመጀመሪያ ደረጃ ምክትል ፕሬዚዳንቶች ሹመትን፣ የ13 የፌዴራል የመጀመሪያ ደረጃ ፍርድ ቤት እንዲሁም የሁለት የከፍተኛ ፍርድ ቤት ዳኞችን ሹመት አቅርበዋል፡፡

አቶ ጥዑም ገብሩ ኃይሉና አቶ ብርሃነ ገብረ መስቀል ዋጋሪ ለፌዴራሉ የመጀመሪያ ፍርድ ቤት ምክትል ፕሬዚዳንትነት የቀረቡ ናቸው፡፡ 

አቶ ጥዑም ገብሩ ብሔራቸው ትግራይ ዕድሚያቸው 52 እንደሆነ፣ በትግራይ ክልል በተለያዩ ፍርድ ቤቶች በዳኝነት ያገለገሉና በአሁኑ ወቅትም በፌዴራል ከፍተኛ ፍርድ ቤት በማገልገል ላይ እንደሚገኙ የግል ሁኔታ መግለጫቸው ያስረዳል፡፡ 

አቶ ብርሃነ ገብረ መስቀል ዋጋሪ ዕድሜያቸው 42 ሲሆን ብሔራቸው ኦሮሞ እንደሆነ የግል ሁኔታ መግለጫቸው ላይ ሰፍሯል፡፡ በኦሮሚያ የተለያዩ ፍርድ ቤቶች የሠሩና በአሁኑ ወቅትም በፌዴራል ከፍተኛ ፍርድ ቤቶች በዳኝነት እያገለገሉ እንደሆነ በግል ሁኔታ መግለጫቸው ተጠቅሷል፡፡

ከቀረቡት ሁለት ምክትል ፕሬዚዳንቶችና 15 ዳኞች መካከል ከሞላ ጐደል ሁሉም የተመረጡት ከአማራ፣ ከኦሮሞ፣ ከትግራይና ከደቡብ ብሔሮች መሆኑ ያስገረማቸው የምክር ቤቱ አባላት የብሔር ተዋጽኦ ለምን እንደማይጠበቅ ጠይቀዋል፡፡ በተለይ የታዳጊ ክልሎች በዳኝነት አለመካተት ምክንያቱን መንግሥት እንዲያብራራ ጠይቀዋል፡፡ ምክር ቤቱን በመወከል ዳኞችን የሚመለምለው የዳኞች አስተዳደር ጉባዔ አባል የሆኑት የምክር ቤቱ የመከላከያና የውጭ ጉዳዮች ቋሚ ኮሚቴ ሰብሳቢ አቶ ተስፋዬ ዳባ ምላሽ ሰጥተዋል፡፡ 

በሰጡት ምላሽም ለዳኝነት ምልመላ ግልጽ ማስታወቂያ መውጣቱንና በቴሌቪዥንም መተላለፉን፣ እንዲሁም ለታዳጊ ክልሎች የመግቢያና የመወዳደሪያ መሥፈርቶች ዝቅ መደረጋቸውን፣ ነገር ግን የመጣ ተወዳዳሪ አለመኖሩን ገልጸዋል፡፡ የብሔር ተዋጽኦው ያልተመጣጠነው በዚህ ምክንያት መሆኑን በማስረዳት የማመጣጠን ሥራው በቀጣይ ለመሥራት ምቹ ሁኔታዎች መፈጠር እንዳለባቸው የዳኞች አስተዳደር ጉባዔ አቅጣጫ ማስቀመጡን ተናግረዋል፡፡  

በዚም መሠረት ምክር ቤቱ የቀረበለትን የሹመት ጥያቄ በአቶ ግርማ ሰይፉ የድምፅ ተአቅቦ በአብላጫ ድምፅ አፅድቆታል፡፡ 

Read 32721 times